ಕಲ್ಲರಳಿ ಹೂವಾಗಿ

ನೀನಿರಬಾರದಿತ್ತೆ?

2012-02-04T21:40:00.000-08:00

ಮುಂಜಾನೆ ಮಂಜು ಮುದ್ದಿಸುವಾಗ
ಮಧ್ಯಾಹ್ನ ನೀಲಿಯು ಸೆಳೆಯುವಾಗ
ಮುಸ್ಸಂಜೆ ರಂಗು ಚೆಲ್ಲಿರುವಾಗ
ರಾತ್ರಿಯು ಮಲ್ಲಿಗೆ ಹೊದಿಸಿರುವಾಗ
ನೀನಿರಬಾರದಿತ್ತೆ ನನ್ನ ಜೊತೆ?

ಕತ್ತಲ ಚುಕ್ಕಿಯು ಮಿನುಗಿರುವಾಗ
ಬಿದಿಗೆಯ ಚಂದ್ರಮ ನಗುತಿರುವಾಗ
ನವಮಿಯ ದಿನದಲಿ ಗಮನಿಸುವಾಗ
ಹುಣ್ಣಿಮೆ ಜಿಂಕೆಯು ಬಂದಿರುವಾಗ
ನೀನಿರಬಾರದಿತ್ತೆ ನನ್ನ ಜೊತೆ?

ಚೈತ್ರದ ಕೋಗಿಲೆ ಹಾಡಿರುವಾಗ
ಶ್ರಾವಣ ಸಂಭ್ರಮ ಹರಡಿರುವಾಗ
ಸ್ವಾತಿಯ ಮುತ್ತಿನ ಮಳೆಯಿರುವಾಗ
ಮಾಗಿಯ ಚಳಿಯು ಕೊರೆಯುತಿರುವಾಗ
ನೀನಿರಬಾರದಿತ್ತೆ ನನ್ನ ಜೊತೆ?

ನೆನಪು

2011-07-18T07:55:00.000-07:00

ಎದೆಯಾಳದಲಿ ಹೆಪ್ಪುಗಟ್ಟಿದ ಮಂಜು
ಮತ್ತೆಮತ್ತೆ ನೆನೆದು ನೀರಾಗುವುದೇಕೆ?
ಕಟ್ಟೊಯೊಡಿದು ಪೂರ್ತಿ ಕೊಚ್ಚಿಹೋಗದು
ಭಟ್ಟಿ ತಾಪಕೆ ಕುದಿದು ಆವಿಯಾಗದು
ಈ ಬತ್ತದ ಸೆಲೆಯ ಕಿತ್ತೊಗೆಯಲಿ ಹೇಗೆ?

ನಾಜೂಕು ಹುಡುಗಿ

2010-08-15T08:55:00.000-07:00

ನನ್ನ ಹುಡುಗಿ ಬಲು ನಾಜೂಕು
ಆದರೇನಂತೆ? ಸಾಟಿಯಾರಿಲ್ಲ ಅವಳಿಗೆ ನಿಜಕ್ಕೂ

ಹಾಲಿನಂತ ಬಿಳಿಪು ಕೆನೆಯಂತಹ ನುಣುಪು ಅವಳ ಮುಖ ಬಣ್ಣ
ಉರಿಬಿಸಿಲಲ್ಲಿದ್ದಾಗ ಮಾತ್ರ ನೆನಪಿಸುವುದು ಟೊಮ್ಯಾಟೋ ಹಣ್ಣ!
ಬಸ್ ಸ್ಟಾಪ್ ಗೆ ತಂಗುದಾಣ ಹಾಕಿಸಬೇಕು ಇನ್ನ
ಆದರೂ...ಆ ಕೆಂದಾವರೆ ಮೊಗ ಎಷ್ಟೊಂದು ಚೆನ್ನ!

ಮಿಂಚು ಗುಡುಗೆಂದರೆ ಭಯ; ನನಗಪ್ಪುಗೆಯ ಹಿತ
ಮಳೆಯಲ್ಲಿ ನೆಂದರಂತೂ ಶೀತ ಖಚಿತ
ಮಳೆ ದೇವರಲ್ಲಿ ನನ್ನ ಪ್ರಾರ್ಥನೆ ಏನು ಗೊತ್ತಾ?
ಮಳೆ ಬರುವುದೆ ಬೇಡ; ಇರಲಿ ಮಿಂಚು-ಗುಡುಗು ಸತತ!

ಕಪ್ಪನೆ ಮುಡಿಯಲಿ ಸ್ವಚ್ಛದ ಹೂ ಮುಡುದರೆ
ಒಪ್ಪವಾಗಿರುವುದೆಂದು ಮಲ್ಲಿಗೆ ತಂದರೆ
ಪ್ರೇಮದರ್ಜಿ ಮಲ್ಲಿಗೆ ಘಮ ಇವಳಿಗಲರ್ಜಿ
ಮಲ್ಲಿಗೆಗ್ಯಾಕೆ ಮಲ್ಲಿಗೆ ಬೇಕು? ನಾನೊಬ್ಬ ಮೂರ್ಖ

ಅಸ್ತಿತ್ವದರ್ಥ

2010-06-12T17:39:00.000-07:00

ಏನು ಜೀವನದರ್ಥ? ಏನು ಪ್ರಪಂಚಾರ್ಥ? ಏನರ್ಥವಿದಕೆಲ್ಲಾ?
ಓದಿಯಾಯಿತು ಆಗಲೆ ಕಗ್ಗ* ಹತ್ತು ಸಲ
ಸುಳಿದಿಲ್ಲವಾವ ಹೊಸ ದರ್ಶನದ ಹೊಳಪು ಮಂಕುಬುದ್ದಿಗೆ

ತರ್ಕಕ್ಕೆ ನಿಲುಕದ್ದು ಭಾವಕ್ಕೆ ಮೀರಿದ್ದು ಇರುವುದು ಏತಕ್ಕೆ?
ನಮ್ಮ ಅನಿವಾರ್ಯತೆಗೆ
ಎನ್ನುವುದೂ ತರ್ಕವಲ್ಲವೆ? ಭಾವವಲ್ಲವೆ?

ಚಿತ್ತದ ಗುಪ್ತಚಿತ್ರಗಳೆಲ್ಲಾ ಚಿತ್ರಗುಪ್ತನಿಗೆ ಗೊತ್ತು
ಕಾದಿದೆ ಕಾದ ಎಣ್ಣೆ ಬಿಸಿ ಬಾಣಲೆ ಬೆಂಕಿ
ಭಯವಿಲ್ಲದ ಭಕ್ತಿ ಎಲ್ಲಿ?

ಅರ್ಥವಿಲ್ಲದೆ ಮಾಡುವುದರ ಒಟ್ಟು ಹಣೆಪಟ್ಟಿ ಪುರುಷಾರ್ಥ
ಸಭ್ಯ ನಾಗರಿಕತೆಯ ತೋರಿಕೆಯ ಅಭ್ಯಾಸ
ಸಂವೇದನಾ ಶೀಲತೆಯ ಒಳಹೂರಣ

ಪ್ರೀತಿ ಮರೆಯಾಗಿದೆ ಪಾರ್ಕಿನ ಬೆಂಚಿನಿಂದಲೂ
ಕಾಳಜಿ ವಕೀಲಗೆ ವಿಚ್ಛೇದನ ಕೇಸಲ್ಲಿ ಮಾತ್ರ
ಎಲ್ಲೆಲ್ಲೂ ಮಮಕಾರದ ಹಾಹಾಕಾರ

ದ್ವಂದ್ವ ನೀತಿಯ ಸಂಘ ಸಂಸ್ಥೆಗಳು ರಾಜಕೀಯ
ಮೋಕ್ಷಮಾರ್ಗವನ್ನೆ ಅರ್ಥಕ್ಕೆ ಮಾರುವ ಸನ್ಯಾಸಿ
ಎಲ್ಲಕ್ಕೂ ಬೆಲೆಯುಂಟು ಇಲ್ಲಿ

ಅರ್ಥ ಸಂಪಾದನೆಯನ್ನೆ ಪರಮಗುರಿಯನ್ನಾಗಿಸಿಕೊಂಡ ಹುಚ್ಚರಿಗೆ
ಪರಮಾರ್ಥದ ಪ್ರಶ್ನೆ ಕೇಳಿದರೆ ದಾರಿ ತೋರುವರು
ಮನೋ ವೈದ್ಯರ ಬಳಿಗೆ

ಗೊತ್ತು ಗುರಿಯಿಲ್ಲದೆ ಎತ್ತಲೋ ಸಾಗುತ್ತಿರುವ ಜೀವನ
ಬೇಕಾಬಿಟ್ಟಿ ಎಂದೋ ಯಾರೋ ಗೀಚಿದ
ಅರ್ಥವಿಲ್ಲದ ಒಂದು ಕವನ

(*ಡಿ.ವಿ.ಜಿ. ಯವರ ಕ್ಷಮೆಯಾಚಿಸಿ).

ಮನಸೆಲ್ಲಾ ಖಾಲಿ

2010-06-12T05:13:00.000-07:00

ದೇಹದಿ ಆತ್ಮವು ನೆಲಸಿರುವಂತೆ
ಮನಸೆಲ್ಲಾ ನೀನೆ ನೀನೆ
ನೀ ಸಿಗದೆ ದೂರಾದ ಮೇಲೆ
ಮನಸೆಲ್ಲಾ ಖಾಲಿ ಖಾಲಿ

ಬರಿದೆ ಗೆರೆಗಳ ಮೂಡಿಸುವಂಥ
ಶಾಯಿಯು ಮುಗಿದ ಲೇಖನಿಯಂತೆ
ನಾಳೆಯ ಹಾಳೆಲಿ ಬಿಳಿಯೆ ಉಳಿದು
ನನ್ನೊಳು ತುಂಬಿದ ಭಾವವು ಮುಗಿದು
ಮನಸೆಲ್ಲಾ ಖಾಲಿ ಖಾಲಿ

ದೀಪಾವಳಿಯ ಸಂಭ್ರಮ ಅಂತ್ಯ
ಶಬ್ದವು ಅಡಗಿ ಎಲ್ಲೆಡೆ ಶೂನ್ಯ
ಸಂತಸ ಕ್ಷಣಗಳ ಪಟಾಕಿ ಮುಗಿದು
ಕಸವಾದ ಪಟಾಕಿ ಪೆಟ್ಟಿಗೆಯಂತೆ
ಮನಸೆಲ್ಲಾ ಖಾಲಿ ಖಾಲಿ

ಹೋದವರು

2010-05-09T10:59:00.000-07:00

ಹೋದವರೆಲ್ಲಾ ಪುಣ್ಯವಂತರು
ಒಬ್ಬರ ಹಂಗಿನ ಪಾಶಕೆ ಸಿಲುಕದೆ
ನಿದ್ದೆಯ ಮಾಡುತ ಸದ್ದೇ ಮಾಡದೆ ಎದ್ದು
ಹೋದವರೆಲ್ಲಾ ಪುಣ್ಯವಂತರು

ಅಳದೆ ಅರಚದೆ ಹಠವನು ಮಾಡದೆ
ಅಮ್ಮನ ತೋಳಿನ ಬಂಧವ ತೊರೆದು
ಶಾಲೆಗೆ ನಡೆಯುವ ಕಂದನ ಹಾಗೆ
ಸುಮ್ಮನೆ ಬಿಟ್ಟು ನಮ್ಮನೆ ಕಡೆಗೆ
ಹೋದವರೆಲ್ಲಾ ಪುಣ್ಯವಂತರು

ಬಡಿಸಿದ ಅಡಿಗೆಲಿ ನೋಣವನು ನೋಡೆ
ರಂಪವ ಮಾಡದ ಸಜ್ಜನರಂತೆ
ಇತರರ ಊಟವ ಕೆಡಸದ ಹಾಗೆ
ಸ್ವಲ್ಪವೆ ಉಂಡು ಪಂಕ್ತಿಯ ಬಿಟ್ಟು
ಹೋದವರೆಲ್ಲಾ ಪುಣ್ಯವಂತರು

ಮನ್ನಣೆಯ ದಾಹ

2010-03-21T00:19:00.001-07:00

ತಿಳಿನೀಲಿ ಬಾನ ಪರದೆಯಲ್ಲಿ
ಮೋಡ ಬರೆದ ಬೆಳ್ಳಿ ಚಿತ್ರ
ಯಾರೂ ನೋಡಲಿಲ್ಲವೆಂದು
ಕೊರಗಿ ಅಳುವುದೆ?

ಕುಹೂಕುಹೂ ಹಾಡೋ ಹಕ್ಕಿ
ಸಂಗೀತವ ಯಾರೂ ಕೇಳೆ
ಊರಲಿರುವ ಜನಗಳೆಲ್ಲಾ
ಅರಸಿಕರೆನುವುದೆ?

ರಂಗುರಂಗು ಬೆಳಕ ನೀಡಿ
ಮುಸ್ಸಂಜೆಯು ಚಿತ್ರ ಮಾಡಿ
ನಂಗೊಂದು ಪ್ರಶಸ್ತಿಯೆಂದು
ಧರಣಿ ಕೂರುವುದೇ?

ಮಳೆಯ ಹೀರಿ ಗಾಳಿ ಸೋಸಿ
ಇಳೆಗೆ ಹಸಿರು ನೀಡೊ ಕಾಡು
ಸಂಬಳ ಹೆಚ್ಚಳ ಇಲ್ಲವೆಂದು
ಮುನಿಸಿಕೊಳುವುದೇ?

ತನ್ನ ಕೆಲಸ ತಾನು ಮಾಡೋ
ಅಸಮಾನ ಕಲೆಗಾರ್ತಿ ಪ್ರಕೃತಿ
ಸುಮ್ಮನವಳ ನೋಡಿಯಾದ್ರು
ಕಲಿಯಬಾರದೇ?

ಗುಡುಗುಡಿಯ ಸೇದಿನೋಡೋ

2010-03-16T03:43:00.000-07:00

ಗುಡುಗುಡಿಯ ಸೇದಿನೋಡೋ
ಒಡಲೊಳಗಿನಾ ರೋಗ ತೊರೆದು ಈಡಾಡೋ

ಮನಸೆಂಬ ಸಂಚಿಯ ಬಿಚ್ಚಿ ದಿನ
ದಿನವೂ ಮೋಹವೆಂಬೋ ಭಂಗಿಯ ಕೊಚ್ಚಿ
ನೆನಹೆಂಬ ಚಿಲುಮೆಯ ಹಚ್ಚಿ - ಬುದ್ಧಿ
ಎನುವಂಥ ಕೆಂಡವ ಮೇಲೆ ನೀ ಮುಚ್ಚಿ

ಬುರುಡಿಯೆಂಬೋದು ಶರೀರ - ಇದ
ನರಿತು ಸುಕೃತಕ್ಕಿಟ್ಟು ಕೊಳವಿಯಾಕಾರ
ವರಶಿಶುನಾಳನೆಂಬ ನೀರ ತುಂಬಿ
ಅರಿವೆಂಬ ಅರುವಿಯಾ ಹೊಚ್ಚೋ ಮೋಜುಗಾರ

ಶುದ್ಧಜ್ಞಾನ ಮೇಲೇರಿ ದಾ-
ರಿದ್ರ್ಯ ದೇಹ ಸುಟ್ಟು ಹೊಗೆಯು ಹಾರುವುದು
ಬುದ್ಧಿವಂತರಾ ಎಳೆದು* ವರ
ಸಿದ್ಧ ಶಿಶುನಾಳಧೀಶನ ತೋರುವುದು

--೦--೦--೦--

*ಬುದ್ಧಿವಂತ ರಾಯನದು?

ಅ.ರಾ.ಸೇ. ಅವರು ಬರೆದಿರುವ ಪುಸ್ತಕದಲ್ಲಿ ಕಡೆ ಚರಣ ಈ ರೀತಿ ಇದೆ

ಶುದ್ಧಜ್ಞಾನ ಮೇಲೇರುವುದು ದಾ
ರಿದ್ರ್ಯ ದೇಹ ಸುಟ್ಟುಹೋಗಿ ಹಾರುವುದು
ಬುದ್ಧಿವಂತರಿಗೆ ತಿಳಿಯುವುದು ನಮ್ಮ
ಮುದ್ದು ಶಿಶುನಾಳಧೀಶನ ತೋರುವುದು

ಇಲ್ಲಿ ಕರ್ತೃ (ಶಿಶುನಾಳ ಷರೀಫರು) ಎಲ್ಲರಿಗೂ ಗುಡುಗುಡಿ ಸೇದಕ್ಕೆ ಯಾಕೆ ಹೇಳ್ತಾ ಇದ್ದಾರೆ? ಧೂಮಪಾನ ಆರೋಗ್ಯಕ್ಕೆ ಹಾನಿಕರವಲ್ಲವೆ? :)

ಇಲ್ಲಿ "ಗುಡುಗುಡಿಯ ಸೇದು" ಅಂದರೆ ಏನು ಅರ್ಥ ಇರಬಹುದು ಎಂದು ಊಹಿಸಿ ಮಾಡಿದ ವಿಡಿಯೋ.

ಮಧುವಂತಿ

2010-03-05T10:47:00.000-08:00

ಸೇವಂತಿ ಸೋಬಗೋ ಮಧುವಿನ ಸಿಹಿಯೋ
ನಿನ್ನ ಹೆಸರ ಚೆಲುವಲಿ ನಾ ಹಾಡುವೆ ಮಧುವಂತಿ

ಸೆಳೆಯುವ ರಾಗ ಅವಳದೆ ರೂಪ
ಹಾಡಲು ಕೊರಳು ಜೇನಿನ ಮಳೆಯು
ಮಳೆಯಲ್ಲಿ ನೆನೆಸುತಾ ಮನದಲ್ಲಿ ನೆನೆಯುತಾ
ಕಾಣುವ ಚೆಲುವದು ಮೈಮನ ಮರೆಸುತಾ

ನಡೆಯುವ ನಡಿಗೆ ಹಂಸದ ಹಾಗೆ
ನಡುವಿನ ಡೊಂಕು ಝರಿಗಳ ಹರಿವು
ನಿನ್ನಪ್ಪುಗೆ ತೆಕ್ಕೆಯು ಮಿಂಚಿನ ಸ್ಪರ್ಶವು
ನನ್ನಯ ತುಟಿಯಲಿ ಸವಿನಾಮದ ಜೇನು

(Thanks to Senthil and Ramesh for translating original Tamil song to English)

ಭಟ್ಟಿ ಇಳಿಸೋ!

2010-02-24T03:50:00.000-08:00

ಭಟ್ಟಿ ಇಳಿಸೋ ತಮ್ಮಾ ಭಟ್ಟಿ ಇಳಿಸೋ
ಬಿಟ್ಟಿ ಸಿಕ್ಕಿರುವಾಗ ಗುಟ್ಟಾಗಾದರೂ ಸರಿಯೆ
ಭಟ್ಟಿ ಇಳಿಸಿ ಒಂದು ತೊಟ್ಟಾದರೂ ಕುಡಿಯೋ

ನೂರಾರು ವರುಷದ ಹಿಂದೆ ದಾರಿ ಬಲ್ಲವರು ಸೇರಿ
ಮೇರು ಪರ್ವತವನೇರಿ ಅರಿತ ಜ್ಞಾನವ ಬಸಿದು
ಭಾರಿ ಅಕ್ಷರಾನ್ನ ಮಾಡಿಟ್ಟಿರುವಾಗ

ಅನ್ನವು ಆರಿ ತಿಂಗಳಾಗಿ ಇನ್ನಷ್ಟು ಹಳಸಿ ತಂಗಳಾಗಿ
ನಿನ್ನದು ತನ್ನದು ಎಂಬ ಸಣ್ಣ ಮತಗಳ ಮದ್ಯ ಸೇರಿಸಿ
ಒಳ್ಳೆ ಹುಳಿಪಾಕ ಮಾಡಿ ಬಿಟ್ಟಿರುವಾಗ

ಸಾಧನೆ ಉರವಲು ಹಾಕಿ ಸದಾ ಪಾಕವ ಕುದಿಸೆ
ಎದ್ದ ಹನಿಗಳನೆಲ್ಲಾ ಪೆದ್ದ ಬುರುಡೆಲಿ ತುಂಬೆ
ಶುದ್ಧ ನಿರಪೇಕ್ಷಾನಂದದ ಅಮಲಿರುವಾಗ

ಮೊಬೈಲ್ ಮಾಯೆ

2010-02-13T02:58:00.000-08:00

ಮರುಳು ಮಾಡಿ ಕೊಂಡೆಯಲ್ಲೆ ಮೊಬೈಲ್ ದೇವಿಯೇ
ಇರುಳು ಹಗಲು ಏಕವಾಗಿ ಜನರು ನಿನ್ನ ಬಿಡದೆ ಹಿಡಿಯೆ

ನೆರೆ ಕಂಪನ ಕಾಲದಲ್ಲಿ ಸ್ಥಿರತಂತಿಯು ತುಂಡಾದಾಗ
ಹಲವು ಸಹಾಯವಾಣಿಗಳು ಮೊಬೈಲು ಆಗಿ ಜಾಣತನದಿ

ಸರ್ವಸಂಗ ಬಿಟ್ಟು ಸನ್ಯಾಸಿಯಾದ ಕಾಲಕ್ಕೂ
ಸರ್ವದ ತನ್ಕಿವಿಯ ಮೇಲೆ ಬಿಡದೆ ನಿನ್ನ ಇರಿಸುವಂತೆ

ಎಡಕೆ ಸೋನಿ ಬಲಕೆ ಚೀನಿ ಎದುರಿನಲ್ಲಿ ಕೊರಿಯನ್ ಬ್ರ್ಯಾನ್ಡು
ತೊಡೆಯ ಮೇಲೆ ನೋಕಿಯ ಆಗಿ ಬಿಡದೆ ಮುದ್ದಾಡಿಪಂತೆ

ಮಕ್ಕಳು ಹಿಡಿದರೆ ಅವರ ಅಕ್ಷರಜ್ಞಾನ ಪೋಪುದೆಂದು
ಸರ್ಕಾರವು ನಿನ್ನ ಸ್ಕೂಲ ಹೊರಕ್ಕೆ ಇಡುವ ನಿಯಮ ಮಾಡೆ

ಎಂದೆಂದಿಗು ತೊರೆಯೆ ನಿನ್ನ ಆನಂದದಿ ಜನರಿಗೆಲ್ಲಾ
ತಂದು ತೋರೆ ಸಿಗ್ನಲ್ನಾ ರಿಲಾಯನ್ಸ್ ವೋಡಫೋನ್ ಏರ್ಟೆಲ್ಲಿನ

ಕೋತಿ ಕುಣಿಯುತ್ತಿದೆ ನೋಡಿ

2010-01-10T09:15:00.000-08:00

(ಇದು ಪುರಂದರ ದಾಸರ ಶೈಲಿಲಿ ಇದೆ - ದಾಸನ ಮಾಡಿಕೊ ಎನ್ನ)

ಕೋತಿ ಕುಣಿಯುತ್ತಿದೆ ನೋಡಿ...ಬಲು
ಛಾತಿಯಿಂದಲಿ ಫಜೀತಿಯ ಮಾಡಿ

ಸ್ವೇಚ್ಛೆಲಿ ತೋಟ ಅಲೆದಾಡಿ...ಮಾಗದ
ಪೀಚಿಗೆ ಎಲ್ಲಾರೊಡನೆ ಕಚ್ಚಾಡಿ
ಕಚ್ಚಿ ಒಂದಿಷ್ಟು ರುಚಿ ನೋಡಿ...ತನಗೆ
ಮೆಚ್ಚುಗೆ ಆಗದೆ ಅರಚಾಡಿ ಕಿರುಚಾಡಿ
ಕೋತಿ ಕುಣಿಯುತ್ತಿದೆ ನೋಡಿ...

ಶರೀರದ ಹೇನನ್ನೆ ತಿಂದು...ಅದನೆ
ಪರಮಾನ್ನ ಮೃಷ್ಟಾನ್ನ ಭೋಜನ ಎಂದು
ಸಾರಾಯಿ ಸಾಕಷ್ಟು ಕುಡಿದು...ನವಿಲ
ಮೀರಿಸೋ ನರ್ತನ ನೋಡಿರಿದೆಂದು
ಕೋತಿ ಕುಣಿಯುತ್ತಿದೆ ನೋಡಿ...

ತಡೆಯೆನು ಮನಕೋತಿ ಕಾಟ...ನನ್ನ
ಕೋಡಗನ ನುಂಗೋ ಕೋಳಿ ಗುರುಪಾಠ
ಬೇಡಿ ಅಡಿಗೆರಗುವೆ ಸತತ...ಉಣ
ಬಡಿಸು ನಿರಪೇಕ್ಷಾನಂದದ ಊಟ

-----೦-----೦-----೦-----

ಛಾತಿ = ದಕ್ಷತೆ, ಚಾಣಾಕ್ಷತೆ
ಫಜೀತಿ = ತೊಂದರೆ
ಪೀಚು = ತೀರ ಎಳೆಯ ಕಾಯಿ
ಕೋಡಗ = ಕೋತಿ
ನಿರಪೇಕ್ಷಾನಂದ = absolute bliss
ಕೋಡಗನ ಕೋಳಿ ನುಂಗಿತ್ತಾ=
ಇದು ಶಿಷುನಾಳ ಶರೀಫರ ಒಂದು ಗೀತೆಯ ಸಾಲು. ಒಬ್ಬ ಗುರುವು ಆಧ್ಯಾತ್ಮ ಸಾಧಕನನ್ನು ಹೇಗೆ ಬದಲಾಯಿಸಬಹುದು ಎಂಬುದು ಈ ಗೀತೆಯ ಸಾರ. ಮಂಗನಂತಿರುವ ಮನಸ್ಸನ್ನು ಆಧ್ಯಾತ್ಮಿಕ ಜ್ಞಾನೋದಯವೆಂಬ ಕೋಳಿಯು (ಗುರು ಪ್ರೇರಣೆಯಿಂದ) ತಿಂದು ಹಾಕಲು ಸಾಧ್ಯ ಎನ್ನುವುದು ಈ ಸಾಲಿನ ಅರ್ಥ.
ಈ ಕೊಂಡಿಯಲ್ಲಿ ಈ ಗೀತೆಯನ್ನು ತುಂಬಾ ಚೆನ್ನಾಗಿ ವಿವರಿಸಿದ್ದಾರೆ
http://sallaap.blogspot.com/2008/10/blog-post_07.html

ಹಸಿವು ಬೇಕಾಗಿದೆ

2009-10-31T14:37:00.000-07:00

ಹೆಚ್ಚಿಗೆ ಉಂಡು ಬೆಚ್ಚಗೆ ಮಲಗಿ
ನೆಚ್ಚ ಮಾಡುತ ದೇಹ ಕೊರಡಾಗಿದೆ
ಕಿಚ್ಚನು ಹಚ್ಚಿ ಎಚ್ಚರಗೊಳಿಸಿ
ರಚ್ಚೆ ಹಿಡಿಸುವ ಹಸಿವು ಬೇಕಾಗಿದೆ

ಚೋದ್ಯವಲ್ಲದ ಮಧ್ಯಮವಾದ
ಪದ್ಯವ ಬರೆದು ಮನಸು ಬರಡಾಗಿದೆ
ರಮ್ಯವು ಆದ ಪೂಜ್ಯರು ಬರೆದ
ಕಾವ್ಯಗಳೋದೊ ಹಸಿವು ಬೇಕಾಗಿದೆ

ಯಾಂತ್ರಿಕ ಬದುಕಿನ ತಂತ್ರವ ಕಲಿತು
ಜಾತ್ರೆಯ ನೋಡುತ ಬುದ್ಧಿ ಮಂಕಾಗಿದೆ
ಸ್ವತಂತ್ರ ಚಿಂತನೆ ಮಂತ್ರವ ಪಠಿಸೊ
ತಂತ್ರಜ್ಞಾನದ ಹಸಿವು ಬೇಕಾಗಿದೆ

ಭಕ್ತಿಯು ನಶಿಸಿ ವಿರಕ್ತಿಯು ಅಳಿದು
ಭುಕ್ತಿಯಾಸಕ್ತಿಲಿ ಆತ್ಮವೆ ಸತ್ತಿದೆ
ರಿಕ್ತತೆಯಿಂದ ಎತ್ತರಕೊಯ್ಯುವ
ಮುಕ್ತಿಯ ಪಡೆಯುವ ಹಸಿವು ಬೇಕಾಗಿದೆ

ಲೋಕದ ಶಾಲೆ

2009-09-06T12:50:00.000-07:00

ಲೋಕದ ಶಾಲೆಲಿ ತರಗತಿ ಏಳು
ಮುಕ್ತಿಯ ಪಡೆಯಲು ಇವುಗಳ ದಾಟು

ಒಂದನೆ ತರಗತಿ ಓದಲು ಸುಲಭ
ಬಂದರಾಯಿತು ಶಾಲೆಗೆ ದಿವಸ
ದಿನಗಳ ನೂಕಿ ಹೊಟ್ಟೆಯ ಸಾಕಿ
ಕಣ್ಣುಗಳೆರಡಿಗೆ ನಿದ್ದೆಯ ಶೋಕಿ

ಎರಡನೆ ತರಗತಿ ಜನಗಳಿಗೆಲ್ಲಾ
ಅರಿವೆಯ ಜಠರದ ಚಿಂತೆಯು ಇಲ್ಲಾ
ಭೋಗದ ಪಠ್ಯಕೆ ದಾಸರು ಇವರು
ಹೋಗರು ಮುಂದಕೆ ಚಟದಾ ಶಿಷ್ಯರು

ಮುಂದಿನ ಕೊಠಡಿಲಿ ಮಂದಿಯು ಜಾಸ್ತಿ
ಬಂದರು ನಗರದ ಗ್ರಾಮದ ವಾಸಿ
ಚೆಂದದಿ ನಡೆಸಲು ಸಂಸಾರ ನೌಕೆ
ಕುಂದದೆ ಗುದ್ದುವರು ವಿಧಿ ಮಾರುತಕೆ

ನಾಕನೆ ದರ್ಜೆಯ ಸಜ್ಜನರು
ಲೋಕದ ಹಿತವನೆ ಬಯಸುವರು
ನಾಕು ಜನಗಳಿಗೆ ಹಿತವನು ಉಣಿಸಿ
ಸಾರ್ಥಕ ಜೀವನವೆನ್ನುವರು

ಅಷ್ಟು ಸಾಕೆನಿಸದೊಂದಿಷ್ಟು ಜನ
ಸ್ಪಷ್ಟ ಗುರಿಯ ಬೆನ್ನಟ್ಟಿಹರು
ಕಲೆವ್ಯಾಪಾರವಿಜ್ಞಾನಶಾಸ್ತ್ರವೊಂದರಲಿ
ಕುಶಲತೆಯ ಪಣವನೆ ತೊಟ್ಟಿಹರು

ಆರನೆ ಶ್ರೇಣಿಯ ಯೋಗಿಯ ನೋಡು
ಯಾರ ಮನ್ನಣೆಯ ಬಯಸದ ಕುಶಲನು
ಕರ್ಮವೋ ಜ್ಞಾನವೋ ದಾರಿ ಇವನಿಗೆ
ಮರ್ಮ ತಿಳಿಯದಿದು ಜನಸಾಮಾನ್ಯರಿಗೆ

ಏಳನೆ ತರಗತಿ ಪಠ್ಯ ನಿಗೂಢ
ತಿಳಿಯಲು ನನಗೆ ಗೆಳೆಯರು ಇಲ್ಲ
ಕೆಳಗಿನ ದರ್ಜೆಲಿ ಮುಂಬಡ್ತಿಯು ಪಡೆದು
ಒಳಕೂರಲು ಕಾವಿಯ ಸಮವಸ್ತ್ರವು ಇಲ್ಲ

ನೀನೆ ಬರಿ ನೀನೆ

2009-07-20T22:29:00.000-07:00

(ಇದು ಹೊಸ ಕನ್ನಡ ಅಲ್ಬಮ್ ಟೈಟಲ್. ಅಲ್ಬಮ್ ರಿಲೀಸ್ ಆಗಕ್ಕೆ ಮುಂಚೆ, ಹಾಡು ಕೇಳಕ್ಕೆ ಮುಂಚೆ ಬರೆದದ್ದು)

ಮನಸಿನ ಹೊತ್ತಗೆ ಪುಟದಲಿ
ಮುನಿಸದೆ ಮಿಡಿಯುವ ಜೀವದಲಿ
ಕನಸಿನ ನಾಟಕ ರಂಗದಲಿ
ನನಸಲಿ ಕಾಣುವ ಸೊಗಸಿನಲಿ
ನೀನೆ ಬರಿ ನೀನೆ

ಕಣ್ಣನು ತಂಪಿಸೊ ಮುಗಿಲಲಿ
ತಣ್ಣನೆ ಬೀಸುವ ಗಾಳಿಯಲಿ
ಸಣ್ಣನೆ ಚಿಟಪಟ ಹನಿಗಳಲಿ
ಮಣ್ಣನು ಸೇರಿದ ಕಂಪಿನಲಿ
ನೀನೆ ಬರಿ ನೀನೆ

ಮರಳನು ಚುಂಬಿಸೊ ಅಲೆಯಲಿ
ಬೆರಳನು ಕೂಡುವ ಹರಳಲಿ
ಕೊರಳನು ತಬ್ಬುವ ಮುತ್ತಲಿ
ಹೆರಳನು ಮುದ್ದಿಸೊ ಮಣಿಯಲಿ
ನೀನೆ ಬರಿ ನೀನೆ

ಸುಗಂಧವ ಸೂಸುವ ಹೂವಲಿ
ದಿಗಂತದ ಚಿನ್ನದ ಬೊಟ್ಟಲಿ
ವಸಂತದ ಚಿಗುರಿನ ಹಸಿರಲಿ
ಚಿಂತೆಲಿ ನೆನಪಲಿ ಉಸಿರಲಿ
ನೀನೆ ಬರಿ ನೀನೆ

ಬೇಸರದಾಟ

2009-07-11T03:23:00.000-07:00

ಜೀವನ ಒಂದು ಬೇಸರದಾಟ
ತಕಧಿಮಿ ಕುಣಿತವು ಏತಕೋ?
ತಕಧಿಮಿ ಕುಣಿಯುವ ನದಿಗಳು ಎಲ್ಲಾ
ಶಾಂತ ಸಾಗರವನೆ ಸೇರುವುವು

ಗೆಲುವಿನ ಏಣಿಯ ಏರಿ ಕುಣಿವಗೆ
ಸೋಲಿನ ಉರಗದ ಉರುಳುಂಟು
ಉರಗದ ಕಡಿತಕೆ ಸಿಕ್ಕಿ ಬಿದ್ದವಗೆ
ಎಗರಲು ಏಣಿಯ ಆಸರೆಯುಂಟು

ಹಾವು-ಏಣಿಗಳ ಪರಿವೆ ನಿನಗ್ಯಾಕೋ
ನಿನ್ನಯ ಆಟವ ನೀನಾಡೋ
ಹಾವಿಗೆ ಹೆದರದೆ ಏಣಿಯ ಬಯಸದೆ
ಆಟವ ಆಡಿ ಸ್ವರ್ಗಕೆ ಸೇರೋ

ಆಟವು ನಿತ್ಯ ಆಟವೇ ಸತ್ಯ
ಸ್ವರ್ಗವೇ ಅಂತ್ಯ ತಿಳಿದಿರಿ ತಥ್ಯ
ಏಣಿಯ ಮೋಹವು ಹಾವಿನ ಭಯವು
ಕುಣಿಸಲು ಮನವ ಅದುವೇ ಮಿಥ್ಯ

ತಥ್ಯವ ತಿಳಿದೊಡೆ ಬೇಸರದಾಟ
ಬೇಸರ ದೂಡಲು ಆಟವ ಆಡು!
ಉಬ್ಬಿಗೆ ಹಿಗ್ಗದೆ ತಗ್ಗಿಗೆ ಬಗ್ಗದೆ
ಯಾತಕು ಜಗ್ಗದೆ ಆಟವ ಆಡು

ವೀರನಾಗೋ!

2009-05-09T08:15:00.000-07:00

(Translation of Aarambh hai prachand.....from Gulaal)

ಮೊಳಗುತಿಹುದು ರಣಕಹಳೆ
ಕಾಳಗದ ಕರೆ ಕೇಳಿಸದೆ?
ದಳದ ಒಳಗೆ ಸೇರಿಯೀಗ ವೀರನಾಗೋ

ಶರೀರ ಪ್ರಾಣ ಆತ್ಮಗಳನು
ವೈರಿ ಶಿರವ ಛೇಧಿಸುವ
ಶರದಲಗಿಗೆ ಗಿರಿವಿಯಿಡುವ ವೀರನಾಗೋ

ಪ್ರಾಣ ತೆಗೆಯೆ ಸಿದ್ಧನಾಗೋ
ಪ್ರಾಣ ತೊರೆಯೆ ಬದ್ಧನಾಗೋ
ಪ್ರಜೆ ಪ್ರತೀಕ್ಷಿಸುತಿರುವ ಆ ಕಲ್ಕಿಯಾಗೋ

ಕೃಷ್ಣನ ಉಪದೇಶ ಸಾರ
ವಿಷ್ಣು ಭಾಗವತ ಪುರಾಣ
ಸ್ಪಷ್ಟವಾಗಿ ಹೇಳುತಿವೆ ವೀರನಾಗೋ

ಕೌರವಪಡೆ ಛಲವ ನೋಡು
ಪಾಂಡವ ಕಡೆ ಕಥೆಯ ಕೇಳು
ಅವರಂತೆ ಹೋರಾಡಿ ಅಮರನಾಗೋ

ಜ್ವಲಂತ ಜಯದ ಆಸೆಯಿಲ್ಲ
ದಿಗಂತವಾಳೋ ಬಯಕೆಯಿಲ್ಲ
ಅಂತ ಬಾಳು ಬಾಳೆಯಲ್ಲ ಕಾಲಧೂಳು!

ಮೃತ್ಯುವೊಂದೆ ಅಂತ್ಯವಲ್ಲ
ತಥ್ಯ ತಿಳಿಯೆ ಭೀತಿಯಿಲ್ಲ
ತತ್ವವಿದನು ಸಾರು ಹತ್ತು ದಿಕ್ಕಿಗೆ

ದಯೆಯ ಮರುಕ ಭಾವ ಬೇಕೋ?
ಶೌರ್ಯವೋ? ಗಾಯವೋ?
ಆಯ್ಕೆಯಿರುವುದಿಂದು ನಿನ್ನ ಮುಂದೆಯೇ

ಹಣೆಯ ಮೇಲೆ ವಿಜಯತಿಲಕ
ಅಣಿಯಾಗಿದೆ ಹೊಳೆಯೆಲೆನುತ
ಹಣೆಬರಹವ ಸರಿಯಾಗಿ ಎಣಿಸೋ

ವಿಜಯಕೇಸರಿ ನೀನೆ
ವಿಜಯದುಂಧುಭಿ ನಿನಗೆ
ವಿಜಯನಾದ ನೀನಾಗುವೆ ಯೋಚಿಸೋ

ಯಾವ ಕವಿಯ ಕಲ್ಪನೆಯಲಿ
ಜೀವನವೊಂದು ಪ್ರೇಮಗೀತೆ
ಅವನನಿಂದು ನೀನು ಧಿಕ್ಕರಿಸೋ

ತ್ವರಿತವಾಗಿ ನಿಷ್ಕರ್ಷಿಸಿ
ಸ್ವೇದ ಹರಿಸೋ ಬಿಸಿರಕ್ತದ
ಜ್ವಾಲೆಯಲ್ಲಿ ನೀನೊಂದು ಕಿಡಿಯಾಗೋ

ತಂತ್ರ-ವೇದಾಂತ

2009-05-09T08:11:00.001-07:00

ಒಂಟಿತಾನಿಹನೆಂದು ಜಂಟಿಯಾಗಲು ಬಂದಳು
ಅಂಟಿಕೊಂಡಳು ಶಿವಗೆ ಶಕ್ತಿಯಾಗಿ
ತಂಟೆಯಿದು ಮಾಯೆಯದು ಅಚ್ಚರಿಯಲಿ ನಮಿಸೆ ತಂತ್ರ
ಗಂಟೆಂದು ಎಚ್ಚರದಿ ದೂರವಿಡೆ ವೇದಾಂತ

ಪ್ರೀತಿಯ ಬೆಳಕು

2009-05-09T08:10:00.001-07:00

(Translation of Hoshwalon ko khabar kya...from sarfarosh)

ಪ್ರೀತಿಯ ಸೊಗಸಿನ ಬೆಳಕೆ
ಕಾಣದು ನನಸಿನ ಜನಕೆ
ಪ್ರೀತಿಯ ದೀವಿಗೆ ಹಿಡಿಯಿರಿ
ಬಾಳಿನ ಸೊಬಗನು ಕಾಣಿರಿ

ಅವಳನು ನೋಡಿದ ತಕ್ಷಣ
ಅರಿತೆನು ನಾ ಹೊಸಕಿರಣ
ಆಗಲೆ ತಿಳಿದಿದು ನನಗೆ
ಇದುವೆ ಪ್ರೀತಿಯ ಮಾಯೆ

ಅವಳ ಮುಂಗುರುಳಿನ ಆಟ
ವಸಂತನಿಗೆ ಕಾವ್ಯದ ಪಾಠ
ಕುಡಿನೋಟ ಬೀರಿದಳು ಆಕೆ
ನನಗದುವೆ ನಶೆಯ ಪೀಠಿಕೆ

ತುಟಿಮೇಲೆ ಉದಯಿಸದ ನನ್ನಮಾತು
ಎದೆಯ ಭಾವಶಿಖರದಲಿ ಅವಿತಿತು
ಮೌನಸಂಜೆಯ ಈ ನನ್ನ ಗುಟ್ಟು
ತಿಳಿಯದಾಯಿತು ಅವಳಿಗೆ ಒಟ್ಟು

ಸಾಧನೆ-ಏಕಾಗ್ರತೆ-ಅಹಂ

2009-05-09T08:06:00.000-07:00

ಛಲದಿಂದ ಬಿಡದೆ ಹಿಡಿದು
ಹೀರುವ ಸಾಧಕ ಜಿಗಣೆಗಿಂತ
ಒಲವಿಂದ ಪುಣ್ಯಕೋಟಿಯ ಬಿಟ್ಟ
ಹೆಂಗರುಳ ಹುಲಿಯೇ ಧನ್ಯ!

ಎಲ್ಲೆಡೆ ಪಸರಿಸುವ ಸೂರ್ಯನ ಅಹಂಗೆ
ಏಕಾಗ್ರತೆಯ ದರ್ಪಣ ಹಿಡಿದು ಸುಡುವುದಕ್ಕಿಂತ
ಜಾಗ್ರತೆಯಲಿ ಶ್ರದ್ಧೆಯ ತೈಲದಿಂದುರಿದು
ಎಲ್ಲೆಡೆ ಬೆಳೆಗುವ ದೀಪವೇ ಧನ್ಯ!

ಬಣ್ಣದ ಲೋಕ

2009-05-09T08:04:00.000-07:00

(The Color of Paradise ಚಿತ್ರ ನೋಡಿದ ಮೇಲೆ ಬರೆದದ್ದು)

ಕಣ್ಣುಕಾಣದ ಸಣ್ಣ ಹುಡುಗನೊಬ್ಬ
ಬಣ್ಣದ ಲೋಕಕೆ ಬಂದು ನಾಕದ
ಬಣ್ಣಗಳ ಕುರಿತ ಚಿತ್ರದಲ್ಲಿ
ಕ್ಷಣ ಕ್ಷಣವೂ ತನ್ಮಯದಿ ನಟಿಸಿ ಜನ
ಮನ್ನಣೆಯ ಗಳಿಸಿದರೂ
ತನ್ನ ಇರುವಿಕೆಯ ತಾ ನೋಡಲಾಗದ
ಕಣ್ಣಿನಂತೇ ಆದ ಎಂದು ನಾ
ಖಿನ್ನನಾಗಿ ಚಿಂತಿಸುತಿರುವಾಗ

ಮಣ್ಣ ಕಣ ಕಣದಿ ಅಕ್ಷರ
ಗಣಗಳೆನ್ನೆಣಿಸುತ್ತಿದ್ದ ಆ ಚಿಣ್ಣ
ಅಣಕಿಸುವ ದನಿಯಲ್ಲಿ ಅಂದ
"ಕಣ್ಣು ಕಾಣದ ನಾ ಕಂಡಿರುವೆ
ಬಣ್ಣದ ಲೋಕವನೂ
ಕಣ್ಣಿರುವ ಮಣದಷ್ಟು ಜನರಲ್ಲಿ ಲೋಕದ
ಬಣ್ಣಗಳ ಕಂಡಿರುವರೆಷ್ಟು?"

ಬಂಧ - ಮುಕ್ತ

2009-05-09T07:53:00.000-07:00

(ಆತ್ಮಶಕ್ತಿಯ ಅಭಿವ್ಯಕ್ತಿಗೆ ನಿಯಮಗಳು ಅತ್ಯವಶ್ಯವಲ್ಲವೇ?)

ಪದ್ಯಕ್ಕೆ ಪ್ರಾಸದ ಬಂಧ
ಭಾವಕ್ಕೆ ಮುಕ್ತಿ
ಭಾಷೆಗೆ ವ್ಯಾಕರಣದ ಬಂಧ
ಅರ್ಥಕ್ಕೆ ಮುಕ್ತಿ
ಶಬ್ದಕ್ಕೆ ಸಪ್ತಸ್ವರಗಳ ಬಂಧ
ಸಂಗೀತಕ್ಕೆ ಮುಕ್ತಿ
ಬಣ್ಣಗಳಿಗೆ ಪಟದ ಬಂಧ
ಕಲೆಗೆ ಮುಕ್ತಿ
ವಿಜ್ಞಾನಕ್ಕೆ ಪ್ರಮಾಣದ ಬಂಧ
ಸತ್ಯಕ್ಕೆ ಮುಕ್ತಿ
ಪೂಜೆಗೆ ಶಾಸ್ತ್ರದ ಬಂಧ
ಭಕ್ತಿಗೆ ಮುಕ್ತಿ
ಆತ್ಮಕ್ಕೆ ದೇಹದ ಬಂಧ
ಜೀವನ್ಮುಕ್ತಿ

ನೂರು-ಒಂದು

2009-05-09T07:51:00.001-07:00

ದೇವಾಲಯದ ಸೊಬಗ ಹೆಚ್ಚಿಸಲು
ನೂರೆಂಟು ದೈವಗಳು
ಧ್ಯಾನಮಾಡಲು ಬೇಕು
ಒಂದೇ ದೈವ
ಜಗದ ಸೊಬಗ ಹೆಚ್ಚಿಸಲು
ನೂರೆಂಟು ವಿದ್ಯೆಗಳು
ಮನವ ತಣಿಸಲು ಸಾಕು
ಒಂದು ವಿದ್ಯೆ

ಎಷ್ಟು ಪ್ರೀತಿ?

2009-05-09T07:50:00.001-07:00

ಎಷ್ಟು ಪ್ರೀತಿ ಎಂದರೆ
ಎಲ್ಲಿ ನೀನು ನನ್ನ ಪ್ರೀತಿಯ
ಹುಚ್ಚು ಹೊಳೆಯ ಪ್ರವಾಹದಲ್ಲಿ
ಕೊಚ್ಚಿ ಹೋಗುತ್ತೀಯೋ
ಅನ್ನುವಷ್ಟು ಭಯ ನನಗೆ!
ಅಷ್ಟು ಪ್ರೀತಿ ನಿನ್ನ ಮೇಲೆ

ಹೊಸವರ್ಷ

2009-05-09T07:32:00.000-07:00

(೨೦೦೭ ಜನವರಿ ೧ ಬರೆದದ್ದು)

ಇಂದಿಗು ನಿನ್ನೆಗು ಏನು ವ್ಯತ್ಯಾಸ?
ಅದೇ ನಾನು, ಅದೇ ಜಾಗ, ಅದೇ ಕುರ್ಚಿ, ಅದೇ ಜನ, ಅದೇ ಕೆಲಸ
ಅದೇ ನಿತ್ಯ ಪುರಾಣ
ಸ್ವಲ್ಪವಾದರೂ ಬೇಡವೆ ಬದಲಾವಣೆ?
ಅದಕ್ಕಾಗಿಯಲ್ಲವೆ ಹೊಸ ವರ್ಷದ ಆಚರಣೆ?

ಇಂದಿಗು ನಿನ್ನೆಗು ಏನು ವ್ಯತ್ಯಾಸ?
ಅದೇ ಪ್ರಕೃತಿ, ಅದೇ ಆಕಾಶ, ಅದೇ ಗಾಳಿ, ಅದೇ ಬೆಳಕು, ಅದೇ ನೀರು, ಅದೇ ಭೂಮಿ
ಪ್ರಕೃತಿ ನಿತ್ಯ ಪುರಾತನ
ಪ್ರಕೃತಿಗೆ ಬೇಡವೆ ಬದಲಾವಣೆ?
ಹೊಸ ವರ್ಷದ ಆಚರಣೆ?

ಸದಾ ಬದಲಾಗುವ ಅಂತರಿಕ್ಷ, ಮಾರುತಗಳು, ನಕ್ಷತ್ರಗಳು, ನದಿಗಳು
ಪ್ರಕೃತಿ ನಿತ್ಯ ನೂತನ!
ಕಾಲನೊಂದಿಗೆ
ನಿತ್ಯ ಪುರಾತನದಿಂದ ನಿತ್ಯ ನೂತನ ಪ್ರಗತಿಯೆಡೆಗೆ
ಸಾಗಲು ಬೇಕು ಒಂದು ನೆನಪು
ಅದಕ್ಕಾಗಿ ಇರಬೇಕು ಹೊಸವರ್ಷದ ಹುರುಪು!

ಅವಳ ನಗು

2009-04-26T00:49:00.000-07:00

ನೀ ನಕ್ಕ ಆ ಸುಂದರ ಸಮಯ
ಬಾನಮೊಗದಿ ಚಂದ್ರನ ಉದಯ
ಕೆಂಪು ಬಣ್ಣದ ಬಿದಿಗೆ ಚಂದ್ರಮ
ದಂತಪಂಕ್ತಿಯ ಮುತ್ತಿನ ತೋರಣ

ನೋಡಿ ಹಿಗ್ಗಿದೆ ಸೌಂದರ್ಯದ ಶೃಂಗ
ಕೂಡಲೇ ಆಯಿತು ಅಭಿಮಾನ ಭಂಗ
ಪಕ್ಕದಲ್ಲೇ ಪೂರ್ಣಚಂದಿರ ಮೂಡಿದನಾಘಳಿಗೆ
ಚುಕ್ಕಿಯಿಟ್ಟು ಸಿಂಗರಿಸಿದ ಕೆನ್ನೆಯ ಗುಳಿಗೆ

ಪೂರ್ಣಾರ್ಧ ಚಂದಿರರ ಸೌಂದರ್ಯ ಸ್ಪರ್ಧೆ
ತೀರ್ಪು ನೀಡಲಾಗದೆ ನಾನು ಸೋತೆ
ಹುಣ್ಣಿಮೆ ಬಿದಿಗೆಯು ಒಮ್ಮೆಗೆ ಆಗಲು
ಬಣ್ಣಿಸಲು ನನಗೆ ಪದಗಳು ಸಾಲದು

ಪ್ರೀತಿಯ ಜಿಜ್ಞಾಸೆ

2009-04-19T09:42:00.000-07:00

ಸೃಷ್ಟಿಯಲಿ ನೂರೆಂಟು ಬಗೆಯ ಜೀವಿಗಳು
ಅಷ್ಟು ಜೀವಿಗಳ ಮನದ ಭಾಷೆ ಒಂದೇ
ಎಷ್ಟೆಷ್ಟು ವ್ಯಯಿಸಿದರು ಮತ್ತಷ್ಟು ಬರುವುದದು
ಸ್ಪಷ್ಟವದು ಪ್ರೀತಿಯೇ ಪರಮಾರ್ಥ

ಕಷ್ಟವೆನಿಸುವವರ ನಿಕೃಷ್ಟರೆಂದೆಣಿಸಿ
ಇಷ್ಟವಾಗುವವರೊಟ್ಟಿಗೆ ಮಾತ್ರ ಇರುವ
ನಷ್ಟವರಗಿಸಿಕೊಳ್ಳದ ಕಪಟ ವ್ಯಾಪಾರ
ಇಷ್ಟೆ ಪ್ರೀತಿಯ ಸ್ವಾರ್ಥ

ಜೊತೆಗಾತಿಯನ್ನರಸುವ ಮೃಗರಾಜ
ಪತಿಗಾಗಿ ಬೇಟೆಯಾಡುವ ಸಿಂಹಿಣಿ
ಸೀತೆಗಾಗಿ ಶರಧಿ ದಾಟಿದ ರಾಮ
ಪ್ರೀತಿಯ ಶಕ್ತಿ ಅಗಾಧ

ಅತಿಕ್ಷಾಮದಲಿ ಮೃಗರಾಜನು
ಸತಿಯೊಡನೆ ಸೆಣೆಸುವ ತುತ್ತಿಗಾಗಿ
ಸೀತೆಯನ್ನೇ ಅಡವಿಗಟ್ಟಿದ ರಾಮ
ಪ್ರೀತಿಯ ಸೆಳೆತ ಕ್ಷಣಿಕ

ನಡುವೆ ಅಂತರವಿರಲಿ

2009-01-13T10:13:00.000-08:00

ನನ್ನ ಮನದ ಪುಟಗಳ ತುಂಬ
ನಿನ್ನ ಮನದ ಪ್ರತಿಬಿಂಬ
ನನ್ನ ಬುದ್ಧಿಯ ಕಿಟಕಿಯಲಿ
ನಿನ್ನ ಗೆಲುವ ಕಾಣ್ವ ಹಂಬಲ

ನಿನ್ನ ಇಷ್ಟಗಳೆಲ್ಲಾ ನನ್ನ ಇಷ್ಟಗಳೇ
ನಿನ್ನ ಕಷ್ಟಗಳೆಲ್ಲಾ ನನ್ನ ಕಷ್ಟಗಳೇ
ನಾನೇ ನೀನಾಗುವ ಈ ತವಕದಲಿ
ನಿನ್ನ ಇರುವಿಕೆಯ ನಾ ಮರೆದಿರಲಿ

ನೀ ಮಾಡಿದ ತಪ್ಪುಗಳು ಕೂಡಿಸಿ
ನನ್ನ ಮನದಾಳದಲಿ ಪಶ್ಚಾತ್ತಾಪ ಮೂಡಿಸಿ
ನನ್ನ ಬೈಗುಳಗಳ ಪ್ರಾಯಶ್ಚಿತ್ತ ಕೊಡಿಸಿ
ನಿನ್ನ ಮನ ನೋಯದಿರಲಿ

ನನ್ನ ಒಪ್ಪುಗಳ ನಿನ್ನಲಿ ಹೇರಿ
ನೀನದನು ಅನುಸರಿಸಬೇಕೆಂದು ಸಾರಿ
ನಿನ್ನ ಹೆಜ್ಜೆಗಳ ನಿರುಕಿಸುವ ಶಿಕ್ಷಕನ ಪರಿ
ನಿನ್ನಸಿಕೆಗಳಿಗೆ ಗೋರಿ ಕಟ್ಟದಿರಲಿ

ನಾನು ನಾನಾಗಿ ನೀನು ನೀನಾಗಿ
ನಾನು-ನೀನು ನಾವಾಗಿ
ನಾವಿಬ್ಬರೂ ಹಾಯಾಗಿ
ನಮ್ಮ ನಡುವೆ ಅಂತರವಿರಲಿ

ನೀನಿಲ್ಲದೇ ಕವನದಲ್ಲೇನಿದೆ?

2008-11-16T01:03:00.000-08:00

ನೀನಿಲ್ಲದೇ ಕವನದಲ್ಲೇನಿದೆ? ನೀನೆ ಬೇಕು...ನಿನಗಾಗಿಯೇ ಈ ಕವನವು...

ನೀನು ಇರದ ಕವನ
ಹೂವು ಇರದ ಉದ್ಯಾನ
ನಿನ್ನನ್ನು ಹಾಡದ ಹಾಡು
ಕುರುಡ ನೋಡಿದ ಪಾಡು
ನಿನ್ನಿಂದ ಕವನದ ಉಗಮ
ಅದರಿಂದ ಪ್ರೀತಿಯ ಸರಿಗಮ
ನಿನಗೆ ಪದದ ಅರ್ಪಣ
ಮಿನುಗೊ ಭಾವ ದರ್ಪಣ
ನಿನ್ನ ದೆಸೆಯಿಂದಲೇ ಕಾವ್ಯ
ಹೊಸತು ಇರಲು ಅದುವೆ ನವ್ಯ
ನಿನ್ನ ಕುರಿತು ಬರೆದ ಸಾಲು
ಓದಲದುವೆ ಜೇನು ಹಾಲು
ನಿನ್ನಲ್ಲಿ ಅಕ್ಷರ ನಿವೇದನೆ
ಗಮನಿಸು ನನ್ನಯ ಪ್ರಾರ್ಥನೆ
ನೀನೆ ಕವಿತೆಯ ಸ್ಪೂರ್ತಿ
ಇರದೆ ಆಗದು ಪೂರ್ತಿ

(ನೀನ್ + ಪ್ರತ್ಯಯಗಳು ಮತ್ತು ಕವನಗಳಲ್ಲಿ ಅವುಗಳ ಬಳಕೆ ಕುರಿತು ಬರದದ್ದು)

ಮುಂಗಾರು ಮಳೆ

2008-11-16T01:00:00.000-08:00

ಪ್ರಣಯದೂರಿನಲ್ಲಿ ಕಳೆದು ಹೋಗೋ ಹುಡುಗ
ಹಾಗೆ ಸುಮ್ಮನೆ ಮೌನ ವೀಣೆ ಮಿಡಿಯುವ ಹುಡುಗಿ
ಕುಣಿಕುಣಿದು ಬಂದಾಗ ಒಲವೇ ವಿಸ್ಮಯ
ಹನಿ ಹನಿ ಮಳೆ ಹನಿ ಪ್ರೇಮ್ ಕಹಾನಿ

ಅವನು ಗೆಳೆಯನಲ್ಲ
ಗೆಳತಿ ಇವಳು ಮೊದಲೇ ಅಲ್ಲ
ನೋವಿನಲ್ಲೂ ನಗುತಿಹ ನಲ್ಲ
ಹನಿ ಹನಿ ಕಣ್ಣೀರ ಹನಿ ಪ್ರೇಮಕ್ ಹಾನಿ

ಕಲ್ಲರಳಿ ಹೂವಾಗಿ

2008-10-28T07:38:00.000-07:00

ಕಲ್ಲುಬಂಡೆಯ ಮನಸು
ಎಲ್ಲೆಲ್ಲೋ ಸುತ್ತಿಬಂದು
ಬಲ್ಲವರ ಪೆಟ್ಟುತಿಂದು
ಕಲ್ಲರಳಿ ಹೂವಾಗಿ